Muscle cars, outo deportivo, wabi (classic cars), trucks/SUV i tur outo speshal i tur motorsaikel ta bini huntu riba e lugá di estashonamentu na Sambil mall (den bario Veeris) 29 di november pa un show/ meeting. E partisipashon ta gratis. E organisadornan di meet ta The Chronicles of Boost (TCOB), iController i carcruise1.com.
E meet/ show akí ta pa doñonan di e tipo di vehíkulonan akí por interkambiá di eksperiensha i pa nan ‘pronka ku nan kos’ – ku hopi biaha ta e resultado di hopi trabou.
Na Kòrsou tambe motorsaikel, outo deportivo, Wabi/classics (outonan di 30 aña òf mas), trucks/SUV/ 4×4, muscle cars i otro outo speshal manera ta hopi popular.
E idea di e show na Sambil mall riba 29 di november ta pa trese e doñonan di e vehíkulonan ekstraordinario akí huntu i e ta un memorial pa actor Paul Walker (september 12, 1973 – november 30, 2013) di pelikula ‘Fast and the Furious’.
[gard]
‘Tur edat i tur marka’
“Motorsaikel, muscle cars, outonan deportivo, 4×4’s, wabi i otro outo speshal di tur edat i marka – sea ta, por ehèmpel, un Camaro klásiko di 1968, Hummer òf un Nissan GT-R nobo-nobo – ta bon biní”, e organisadornan ta bisa. “Por lo demas no ta importá si e vehíkulo ta original, restourá òf custom made. Nos ta invitá tur amante di e tipo di outonan i motorsaikel akí pa bin kompartí nan hòbi.”
E organisadornan ta konta ku nan a papia ku numeroso klup di outo I motorsaikel riba e isla i ku e miembronan di e klupnan akí lo ta presente, pero e organisadornan ta enfatisá ku personanan ku no ta miembro di un klup tambe ta bon biní pa hasi e rekorido.
[gard]
“Tur hende ku un outo speshal i motorsaikel por bini. Hústamente nos ke trese personanan ku diferente tipo di outo i motorsaikel ekstraordinario huntu. E totalidat ta gratis i ta deseabel pa bo mèldu adelantá, pero esei no ta obligatorio”, nan ta splika.
E show na Sambil ta start na 16:00’ or. Por haña mas informashon riba e website www.carcruise1.com òf www.tcobcur.com