Trabou nan pa Curaçao Drag Fest 2014 ta full den swing kaminda FAC y su Komishon Organisadó ta bai presentá na fanátiko, koredor y públiko di e deporte di drag race pa e fecha nan 29 y 30 di aprel y 1, 2 y 3 mei próksimo ku un kompetensia di drag race internashonal ku paisnan i isla nan nobo den e deporte di drag na Curaçao International Raceway na Ronde Klip.
E outo Mazda RX 8 “Blackout” ku ta propiedat di e yu di Kòrsou Leendert Van Rumpt, mihó konosí komo “Peter di Master Painting” i manehá pa Abel Burgos di “Abel Performance” a kaba di partisipá na un di aktividat mas grandi di show y drag racing na Orlando, Florida ku ta e “Nopi Show & Racing”.
Den e Nopi show aki e outo “Blackout” ku Abel Burgos ku e sistema nobo di “Fuel Tech” a registrá su mihó tempu ku ta 7.13 sekònde riba 190 miya pa ora.
Ku e tempu aki “Blackout” a bira e rotary 2 rotor mas rápido di e sistema operashonal nobo di Brazil “Fuel Tech”.
Sin duda e preparashon di e outo ta tumando lugá pa asina fin di luna aki dilanti su públiko pa bai na duna un bon presentashon.
Djadumingu 20 di aprel tin e tour rònt Kòrsou di outo i motosaikel nan di drag. Kuminsando 10.00 na MCB Saliña i terminá na mes un sitio.
Djamars 29 di aprel ku un outo i motosaikel show na Brionplein ku ta kuminsá pa 17.00.
Entrada pa Test & Tune Night djarason 30 di aprel ta Ang. 25,= pa Adulto i mucha bou di 12 aña ta Ang. 5,=.
Entrada pakete di 3 dia pa pit ta kosta Ang. 100,= pa 3 dia pa adulto. Pa bo drenta via entrada di Pit, kada outo mester tin un sticker di Tool Car (bo mester ta un partisipante), òf Sekshon A (kortesia), òf Sekshon B (bo mester kumpra esaki na porta pa ANG 25,= pa 3 dia).
E aña aki tin oportunidat pa parker den sekshon B ku ta tira pa pit área ku ta kosta Ang. 25,= pa 3 dia òf por para na sekshon D tras di tribuna di betòn pa Ang. 15,= pa 3 dia.
Entrada pa pit djaweps 1 di mei i djabièrnè 2 di mei ta kosta Ang. 35,= pa adulto i mucha bou di 12 aña ta Ang. 20,=.
Entrada pa pit djasabra 3 mei ta kosta Ang. 50,= pa adulto i mucha bou di 12 aña ta Ang. 25,=.
Entrada sekshon general pa adulto ta kosta Ang. 25,= pa persona pa dianan 1, 2 y 3 di mei.
Entrada general pa mucha bou di 12 aña ta kosta Ang. 5,= pa dia.
Wak pa bo reserva e dianan aki pa e selebrashon di 43 aña drag racing ABC y 18 aña Curaçao International Raceway.
Danki na tur e spònser nan ku ta hasi Drag Fest 2014 posibel ku ta CTB ofisina di Turismo di Kòrsou, Curoil, NAPA Auto & Truck Parts, Alcolado Glacial, Gomez Shipping, AVF Antiliaanse Verf Fabriek, Coca Cola, Apache Heavy Equipment, Hucor Holding ku Subway, Pizza Hut y KFC, Medina Cargo Services, Western Trading y Dunlop Tires, Fun Miles, Radio Rock Kòrsou 88.3 i Mi 95 ZFM 95.7.