Práktikamente tur kos ta kla pa sera e último wikènt di vakashon ku e “Summer Nationals” e fin di aki na Curaçao International Raceway na Ronde Klip.
Djamars 29 a tuma lugá e inskripshon nan Topaz Party Center di kual kos a bai hopi bon. E kareda aki ku tin e toke lokal a kue kaminda international ya ku nos lo bai tin algun koredor y vehíkulo nan ku ta bini for di eksterior.
Di Venezuela nos tin e outo den Super Modified A, “Kareda di Machu nan”ku ta “Zapato Grande 2” manehá pa e ya kasi yu di Kòrsou Danilo Namour. E outo aki lo bai ta den kompetensia huntu ku “Balul Special” di Osman Osman ku ta bula for di Aruba pa bin manehá su outo i “Mr. Holley 4” manehá pa Johannes de Boer ku tin ku bai defendé su titulo. For di Boneiru lo tei Hennelly Engelhart ku ta bin kore su Pontiac “Wild Thing”. For di Aruba lo bai tei e yu di Kòrsou driver y tunner Dennis Brouwer pa kore e Mazda RX7 “Rafik”.
Motosaikel su kategoria Krioyo Outlaw Bike no ta keda atras ya ku for di Hulanda nos lo bai tin Charly Anasagastie ku bai manehá e “Angelo Power 1” y Randolf Torbed di “Balachi Racing” lo manehá e motosaikel di “Angelo Power 2”. Di otro banda “Balachi Racing” lo bin ku for di Aruba Jayson “G” Geerman di “Destroyer” pa manehá “Kastigala 2”. Manera ya ta kustumber ku Jayson Angela di Aruba lo tei pa kore su motosaikel nan di “Still Balling Racing”.
Pues e kareda lokal ya ta international ku partisipashon di vários koredor y tunners ku ta biniendo pa hasi wikènt aki kuminsando for di djabièrnè sigui pa djasabra mas grandi. Ta e último wikènt di vakashon pues famia kompletu kue kaminda pa Curaçao International Raceway na Ronde Klip.
Djabièrnè 1 di ougùstùs lo bai na kore e kategoria nan heads up. Outo lo kore Super Comp. 8.90 – 9.20 Pro light .400, Super Gas 9.90 – 10.20 Pro light .400, Super Street 10.90 – 11.20 Pro light .500, Super E.T. 11.90 – 12.20 Pro light .500 y motosaikel ta kore Super Comp. Bike 8.90 -9.20 Pro light .400 y Super Curaçao Street Bike 9.30 – 9.60 .500 Pro light .500.
Porta ta habri 18.00 (6’or) y pa 19.00 (7’or) lo kuminsá ku e kualifikashon nan.
Djasabra 2 di ougùstùs lo bai na kore e kategoria nan bracket. Krioyo Bracket Box 7.51 – 11.50 Full Tree .500, E.T. Bracket No Box 9.20 – 13.99 Full Tree .500, Quick 32 Bikes e 32 motosaikel nan mas rápido Full Tree .500, Krioyo Outlaw Bike e 16 motosaikel nan mas rápido Pro light .400 y Super Modified A / Kareda di Machu ku Pro light .400.
Porta ta habri 17.00 (5’or) y pa 18.00 (6’or) lo kuminsá ku e kualifikashon nan.
Entrada pa dia nan 1 y 2 di ougùstùs ta pa adulto Ang. 15,= i mucha bou di 12 aña ta Ang. 5,=.
Danki ta bai na Auto City, ARPO Body shop, EMS Dyno, AVF Antiliaanse Verf Fabriek,, Star Motors, Western Trading ku tire nan Dunlop, Alcolado Glasial, IEPA Agencies ku LS2300.
